Renungan Punguan Na Hohom

Punguan Parningotan di Sitaonon/Hamamate ni Tuhan Jesus

HATA HUHUASI

Nunga godang huria di HKBP na so patupahon PUNGUAN NA HOHOM. Adong deba na padomuhonsa tu parmingguon di parningotan di HAMAMATE ni Tuhan Jesus. Hape, sada hasurungan ni HKBP do i na ingkon patupahon SAHALI SATAON Punguan Na Hohom. SAHALI SATAON punguan na hibul holan marningot SITAONON DI HAMAMATE ni Tuhan Jesus manghophop hita. Tung so sitadingkononhon do i. Molo didok deba huria, ndang dipatupa be I ala adong do parmingguon botari. Hape holan 1 ¼ jom do i, mamungka sian pukul 14.00 sahat tu pukul 15.15. Tung sur ape adong parmingguon di tingki i (14.00-15.15) tumagon do pasohoton i laho patupa PUNGUAN NA HOHOM. Holan SAHALI SATAON do i, boasa soadahonon?

Nunga adong manang na piga buku PUNGUAN NA HOHOM. Alai, ala saleleng marhuria ahu, sai hupatomutomu do sijahaonhu di Punguan na Hohom. Ido na dipangido angka dongan asa dicetak, jala ima buku na metmet on. Anggiat ma ndang adong be huria na so patupa Punguan na Hohom, jala boi gabe pangurupi buku on. Tuhanta ma mamasumasu.

Ephorus HKBP

Pdt. Dr. B Napitupulu

PUNGUAN NA HOHOM

(Pkl. 14.00)

Marende : 449 : 1 – 2 “Sai Solhot tu Silangmi” BL 300

Marhitehite Goar ni Debata Ama, dohot Goar ni Anakna Tuhan Jesus Kristus, dohot Goar ni Tondi Parbadia na tumompa langit dohot tano on. Amen.

Mandok mauliate ma hamu di Ama I naung patauhon hamu manjalo tohap dibagasan hatiuron i, siteanon ni angka na badia i. Ai nunga diroro hita sian gomgoman ni haholomon i, jala dipaunsat hita tu bagasan harajaon ni Anak, haholongan ni rohaNa. Di bagasan Ibana ma adong di hita haluaon i. Ima hasesaan ni angka dosa.

Martangiang ma hita,

Ale Amanami na marhabangsa di banua ginjang. Mandok mauliate do hami tu Ho sian nasa rohanami, ai ndang hasuhatan holong ni rohaM tu hami. Disuru Ho do AnakMu na sasada i tu portibion, manaon ragam sitaonon, haleaon, insak-insak, pastap-pastap dohot tijur pe; ro di na manaon hamatean laho humophop hami, asa malua hami sian dosa dohot sian hamatean na manongtong i. Ro do hami saonari tu jolom, marhite parningotan ni sitaonon dohot hamamate ni Jesus Tuhannami. Naeng uhir tu rohanami bernit ni sitaononNa I, asa marhite I nian uhir tu rohanami balga ni holongMi, asa mabiar hami tumadingkon Ho. Hupelehon hami ma dirinami tu Ho, urasi ma hami marhitehite mudar ni Jesus Anakmi, asa tung badia hami, jala tangkas malua hami sian gomgoman ni dosa dohot hamatean. Amen.

Marende : 182 : 1 + 6 “Haholongan Na Badia” BL 24

Nunga loja jala maheu Tuhanta Jesus Kristus. Dung ditangkup Ibana di bodari ni ari Kamis I, ndang maradian nasida mangaleai Ibana. Marsitutu nasida patubu sitindangi gapgap, asa tung bulus roha ni si Latus mandabu uhum hamatean. Nunga marragam dibahen si Latus, didok, naeng paluahon nian, hape lam ganda do bernitna diahap Jesus. Ditanggali do bajuNa, dilinsingi Ibana. Nunga mamungka mabugang pamatangNa jala mabaor mudar sian i. Nunga dibahen sungsang duri tu simanjujungNa, jala ndang maralang nasida mangalombuti, asa dohot sian simanjujungNa mabaor mudar i. Di na lam nangkok mata ni ari di ari Jumat I, lam maniak ma angka bugang i. Mamereng sitaonon ni Jesus ndada lam moru panosak nasida di Jesus. Sai songon jolma na mauas di mudar nasida sude. Lam gogo tahe nasida manjouhon asa diparsilangkon Ibana. Ujungna, dibuat si Latus ma haputusan I, asa diparsilangkon Jesus, nang pe ndang adong salana, jala didok ibana: lias ibana sian i.

Marsurak ma Jahudi I manjalo Jesus. Diboan nasida ma Jesus tu Golgata mamolus via dolorosa, mamolus “dalan sitaonon”. Molo songon na lambat Jesus, disurahi huhut dionjarhon, sipata ma tinggang Ibana, jala sipata laos didondoni hau parsilang na dokdok I Ibana. Nunga lam suda gogoNa, Alani lojaNa, dohot Alani mudar naung durus sian pamatangNa. Hehe Ibana, diampehon silang I, tungkap ibana muse dang tartuhukNa be. Di na so tolapsa be mamboan, ditangkup nasida ma si Simon Kirene laho mamboan hau parsilang i tu Golgata.

Dung sahat tu Golgata lam gogo ma marsurak angka Jahudi i. Sai songon na sombu panghilalaanna mamereng hinaparir sitaonon ni Jesus i. Di Golgata, dipeakhon nasida ma hau parsilang I, dung I diampehon nasida ma Jesus tusi, dilabang ma tanganNa dohot patNa, sabur ma mudar i. Dipajongjong ma muse hau parsilang I, gantung ma Jesus disi; maraburan ma mudar sian patNa dohot tanganNa.

Ndang pola manghitir panghilalaan nasida di na marsasar mudar sian tangan dohot patNa uju dilabangkon tu silang i. Marsurak nasida, songon na mangolophon dung jongjong hau parsilang I, jala gantung Jesus disi.

Alai anggo Jesus Tuhanta I, bulus do rohaNa mangauhon sude sitaonon i. Nunga tangkas dilehon Ibana diriNa hasahatan ni nasa sitaonon ni jolma alani dosa. Alai dung gaung Ibana di silang I, ndang laos mauhom Ibana. Marsoara do Ibana pitu hali sian silang i.

Tabege ma soaraNa i.

Marende 77 : 1 – 2 “Hamu saluhut halak” BL. 65

Nunga gantung Jesus di hau parsilang i. BohiNa dohot pamatangNa nunga lam mamontar Alani lojaNa laos huhut nunga godang mudarNa na durus i. Deba mudarNa I mardekdekan tu tano. Deba laos mangimpal di pamatangNa, alai laos adong dope na imbaru mabaor, songon bogas ni labang I, ndang tarpaidaida sasintongna bernit ni parniahapanNa i. Alai anggo angka na mamparsilangkon Ibana I songon na hisar do bohina. Nndang tarida idaon na loja nasida manganangkohi dolok i. Las roha nasida jala sombu panghilalaanna mamereng Jesus na manaon na di silang i. Hape di na songon I sitaonon ni Jesus I, jala songon I pangalaho ni angka na mamparsilangkon Ibana I, marsoara ma Ibana, manoarahon soara parjolo sian silang I, didok:

(1) “ALE AMANG ! MARPAMUATI MA ROHAM MIDA NASIDA, AI NDANG DIBOTO NASIDA NA BINAHEN NI NASIDA I.”

Na ringkot antong tangiang di Tuhan Jesus. Sogot manogoti, nunga laho Ibana tu balian, martangiang sahalakNa disi (Mark. 1 :35). Dung dilehon mangan 5000 halak, dipamuli natorop I, jala siseanNa pe nunga disuru Ibana pajolohon tu bariba nangkok ma Ibana tu dolok, sasadasa martangiang disi (Mat. 14:23). Martangiang Ibana andorang so bongot tu Getsemane (Joh. 17). Tolu hali Ibana martangiang di Getsemane (Mat. 26 : 39 – 44).

Tangiang I do na parjolo ruar sian Ibana dung gantung di hau parsilang i. Tung so boi do ambaton ni manang aha parsaoranNa, hasadaonNa tu Ama i. Bulusna I hata ni Tuhan Jesus mandok : Ndang diboto nasida na binahen nasida. Ndang diboto natorop I haleaon dohot hapariron na pinamasa nasida tu Jesus I ? Ndang diboto angka malim dohot situan natorop na binahen nasida i? Ndang diboto angka Parise ? Godangna I tahe na maoto Alani portibi on. Godangna I angka na margoar bangso ni Debata, angka pande agama, angka sipajoloon di masyarakat, dohot sihatoropan na maoto jotjot ndang mamoto, manang paula so diboto na binahenna tu Tuhan Jesus. Alai tung gogo do soara ni Jesus na martangiang i. Tangiang I, tangiang pangidoan di hasesaan ni dosa do I, mangido hasesaan ni dosa ni angka na mangaleai Ibana, na mangalinsingi Ibana. Naeng patar tu saluhut jolma, paboa hasesaan ni dosangku, dosamu, dosanta. Jalo silang I mangalinggomi ngolum. I do mual hangoluan.

Marende 179 : 1 + 3 “Adong Do Sada Mual” BL 20

Didok rohanasida, ingkon pasobokon do Jesus tu parjahat jala pardoa, naeng mangholipi hajahaton dohot dosa nasida. Diparsilangkon nasida do Ibana di tongatonga ni dua halak parjahat na somalin. Tangkas do nian didok si Latus, na so adong dapotsa sala ni Jesus. Tangkas do mura antusan ni halak paboa sitindangi gapgap do na nidok nasida taringot tu Tuhan Jesus. Ai didok: Diorai Jesus nasida manggarar guguan tu Kesar, hape tangkas do didok Jesus lehon hamu tu Kesar i. Didok: manggunturi Ibana di Galilea, Samaria, dohot di Judea, hape HADAMEON do sian Ibana. Alai dibahen nasida angkalangkal, dibahen sipaototo laho paleahon Jesus I, gabe di tongatonga ni parjahat Ibana diparsilangkon. Ndang pola manjua Ibana, ai nunga rade Ibana dipasobok tu parjahat, ai naung rade do Ibana manjalo dosa ni portibi on ampe tu Ibana. Rade Ibanda gabe dosa nang pen dang mardosa (2 Kor. 5:21). Rade do Ibana singkatta di silang i.

Nunga songon I haradeon ni Jesus, hape dohot do sada sian na targantung I mangaleai Ibana, songon pangaleai ni angka soldadu na pauruuru Ibana. Marsineang do Ibana mandok tu Tuhan Jesus; ai ndang Kristus I Ho? Palua ma diriM nang hami antong!

Alai laos di hatiha I do dialusi donganna na targantung I Ibana, didok: Ndang dihabiari ho hape Debata. Atik pe rap hona uhum hita? Uhum na tigor do na tu hita, ai tajalo upa ni pambahenanta; alai anggo Ibana ndang adong diula na so ture. Laos huhut ma didok tu Jesus; “O Jesus, ingot ahu, ia dung sahat Ho tu HarajaonMi.” 

Didia do hita nuaeng? Pardosa do hita! Rap dohot ho Amang, rap do ho Inang, dohot parjahat na mangaleai Jesus i? Manang, rap do ho dohot parjahat na mananda dosana jala pasahat dirina tu Jesus. Dohot Ibana ma hita saonari, rap hita manghilala jala mangoku dosanta, asa dohot hit taruli di hata ni Jesus I, hata na paduahon jinouhonNa sia silang i:

(2) SITUTU DO HATANGHON TU HO “SADARION DO RAP DOHOT AHU DI PARADEISO”

Marende 171 : 2 “Tandai Ma Au” BL. 49

Nunga lam gale Tuhan Jesus. Nunga lam suda gogoNa. Lam manintak muse mohop ni ari.  Ndang tartaon mohopna molo tonga ari disi. Maniak ma dihilala Jesus sude pamatangNa I, hape ndang tarhahuasa. So boi humusor tanganNa naung hona labang di silang i. Nirimpu do dompak hinahansitna I rohaNa dohot panghilalaanNa. Hape tongtong do umbalga holongNa tu jolma I, umbalga holongNa tu hita, umbalga holongNa tu inaNa dohot siseanNa, ai diparrohahon dope inaNa dohot siseanNa na adong disi. Tongtong do umbalga holongNa tu jolma, umbalga holongNa tu ahu, tu hamu, tu ho inang, tu ho amang, umbalga holongNa sian haberniton i. Didok Jesus ma:

(3) “NDI MA INANG ANAKMI! HUHUT DIDOK TU SISEANNA I: NDI MA INANG MI.”

Di tongatonga ni natorop I adong manang piga parompuan na manghaholongi Ibana mangihuthon Ibana sahat tu Golgata. Anggo angka siseanNa holan si Johannes, sisean haholongan I do na mangihuthon Ibana tu Golgata. Laho do sude nasida maporus. Dibereng Jesus do angka parompuan dohot sisean na sahalak I di tongatonga natorop i. Ndang haambatan na hansiti Ibana mamereng inaNa dohot siseanNa i. Ndang haambatan manang aha Ibana mamereng ahu, dohot hamu. Soara na parjolo, soara tu Ama I do I, mangondihon angka pardosa. Soara na paduahon tu angka pardosa na manopoti dosana do I, mangalehon bagabaga haluaon. Soara na patoluhon tu angka na porsea do I padomuhon nasida songon keluarga ni Kristus. Manang angka ise na mamereng tu silang I, manang angka ise na patutoru diri tu silang ni Jesus I di bagasan haporseaon, nunga gabe sada keluarga nasida, ima keluarga ni Kristus.

Ndang tarsoadahon si Maria so anakna Jesus. Ndang tarpasiding Ibana panghilalaan ni ina pangintubu mamereng Jesus i. Boha do panghilalaonmu inang aut dipaberengbereng ho, rindang ni siubeonmu songon i. Boha do roham amang aut sura sinuan tunasmu songon i? Sai songon sambilu na maneat ateate dohot pusupusuna na masa tu Tuhan Jesus i. Sai songon asom na tinetekhon tu bugang soara ni Jesus tu nasida. Alai sian nasa gogo ni haporseaon ditangihon nasida soara ni Jesus, ai olat ni I ma dijangkon sisean I si Maria tu jabuna.

Marende : 121 : 2 “Jesus Raja Ni Huria” BL. 97

Nunga marsaringar sian hau pinarsilang I soara hasesaan ni dosa. Nunga tarbege bagabaga haluaon. Nunga dipadiri keluarga na imbaru, keluarga ni Kristus. Sude I dipatupa Tuhan Jesus andorang so sahat tu hos ni ari. Di hos ni ari di pukul 12.00 arian, mangholom ma sandok portibion Loja do angka na pistar sahat tu tingki hamajuon on, manangkasi aha do na masa uju i. Sanga do didok: gerhana na masa disi: alai boi do ditontuhon, na so he masa gerhana di hatiha I, jala ndang hea dope masa jala ndang boi masa gerhana sampe 3 jom, ai sahat tu pukul 3.00 na mangholom i.

Antong aha do na masa disi? Pambahenan ni Debata do i. Ulaon ni Debata do i. Nunga diampehon sude dosa ni jolma tu Tuhan Jesus. Tongon do angka sahitta, diusung Ibana, jala angka pardangolanta diporsan; alai anggo rohanta mandok: Debata do na maminsang, mamukul dohot pasipal Ibana. Hape Alani pangalaosionta Ibana tartulang, binahen ni hajahatonta Ibana mabugang. Ampe tu Ibana pinsangpinsang parhitean ni hasonanganta, jala binahen ni bugangNa malum itahilala. Ai on do dipatupa Debata: humophop hita gabe dosa Ibana na so tumanda dosa, asa gabe hatigoran ni Debata hita dibagasan Ibana.

Ala naung dibagasan dosa Ibana na so tumanda dosa, naeng patuduhonon ni Debata na marujung tu haholomon do dosa, jala marujung tu hamatean. Laos huhut gabe tarida, sude manghuphupi bohina tu Jesus naung gabe dosa i. Mata ni ari pe ndang olo paruar sinondangna mambahen tarida Jesus naung gabe dosa i. Dihilala Jesus do, ndada holan na tinompa I songon na marsidingsiding tu Ibana. Dihilala do naung ditinggalhon Ama I Ibana, ai tung so tarpadomu do Debata dohot dosa. Tar dipukul 3 di ujung ni haholomon I, marsoara ma Jesus:

(4) “ELI ELI LAMA SABAKHTANI, DEBATANGKU DEBATANGKU BOASA TUNG TADINGKONONMU AHU?”

Songon I ma jorbut ni panginona ni dosa i: Debata, Anak ni Debata ditadingkon Debata. Nda tadingkonon ni Debata do hita Alani dosa? Alai ala naung tu Jesus ampe dosanta I, gabe Ibana ma ditadingkon Ama I, asa gabe saor Ibana do hita. Di bagasan Jesus dipadame jala dipadenggan Debata dirina dohot jolma. Jesus do PARDAMEANTA; Ibana do PARDENGGANANTA.

Marende : 180 : 2 – 3 “Ro tu Jesus ho na loja” BL. 228

Mansai patar do di saluhut natorop pangajarion ni Tuhan Jesus, paboa Ibana do silehon hangoluan. Godang do nang pandohan dihatahon Ibana laho paandarhon i. I do nang na hinatahonNa tu boru Samaria I, di na nidokNa: “Aut diboto ho basabasa ni Debata, jala aut ditanda ho na mangido aek inumon sian ho, ra olo ho mangido tu Ibana: dung I lehononNa ma tu ho aek na mangolu. Na manginum aek silehononKi, na so tupa mauas be I rodi salelenglelengna. Ai anggo aek silehononKi, gabe mual do I dibagasan ibana, na mabaor sahat ro di hangoluan salelenglelengna. Gariada tahe, ndada holan holan Ibana aek hangoluan, alai marparbue do I nang tu angka na porsea di Ibana, ai didok: “Angka batang aek na mangolu do na mabaor sian na porsea di Ahu”.

Alai nang pe Ibana mual hangoluan, nang pe batang aek na mangolu mabaor sian na porsea di Ibana, dijouhon Ibana do sian hau pinarsilang I pandohan na palimahon:

(5) “MAUAS AHU!” 

Boha do boi mauas mual hangoluan?

Songon I ma hansit sitaonon i. Nunga tung godang mabaor jala durus mudra sian pamatangNa. Manintak do muse mohop ni mata ni ari na mambahen mardekdekhan hodok sian pamatangNa, jala laos marsampur dohot mudar i. Songon I hansitna, so adong siinumon di tanganNa. Tung sur ape adong nab oi mangurupi. Sude nunga marsitading tu Ibana, asing ni angka boruboru na marhagaleon I, dohot si Johannes, sisean haholonganNa i. Nang pe mual hangoluan Ibana, nang pen dang mauas be na manjalo siinumon sian Ibana, alai ala ni hansit ni sitaononNa I, mauas do Ibana.

Alai, laos huhut do mauas Ibana di haroro ni jolma manjalo panghophoponNa i. Mauas Ibana di haroro ni angka na hinobasanNa i. Mauas Ibana di haroro ni angka siseanNa i. Mauas do Ibana di haroronta saonari. Mauas do Jeses diharorom Inang, mauas do di harorom Amang, olo do ho pasombu uas ni Jesus i?

Marende 379 : 3 – 4 “Ndang Sadihari” BL 252

Nunga lam bot ari. Lumobi di paretongan ni ari uju I, di bangso Jahudi, ndada pukul 12.00 borngin mamungka ari na mangihut. Di pukul 6 bot ari do I masa. Pukul 6 bot ari nunga dirajumi nasida I ari marsogotna. Di bagasan hapariron I, di bagasan hahansiton I nunga dihilala Tuhan Jesus naung singkop diula Ibana ulaon panghophopon i. Nunga dihilalanaeng bongot Ibana tu hamatean, ujung niuhum ni Debata ala ni dosa. Dihilala Tuhan Jesus ma naung sude singkop diula Ibana, dijouhon ma sian silang I:

(6) “NUNGA MARUJUNG!”

Nunga marujung parsirangan ni Debata dohot jolma, ai di bagasan panghophopon na pinatupa ni Jesus I, nunga mardomu muse Debata dohot jolma. Di panghophoponNa I, nunga dipadomu Debata diriNa dohot jolma.

Nunga marujung huaso ni dosa. Nunga marujung huaso ni sibolis. Dibagasn Jesus sude angka na porsea margogo, jala marhuaso mandok laho ma ho bolis sian lambungkon.

Nunga marujung, laos marlapatan do I huhut, nunga rimpas jala singkop holong ni Debata mangulosi hita. Nunga singkop jala rimpas asi ni rohaNa mamornohi ngolunta. Nunga rimpas jala singkop jumping hita hangoluan, ai nunga singkop ruar hita sian hamatean. Nunga marujung laos huhut do I joujou tu hita: nunga marujung panundalionta tu Debata; nunga marujung hamalasonta marsaor dohot Debata. Auhon tu roham, hansit, parir, paet do ditaon Jesus laho patupa i.

Marende 76 : 2 “Sada nama sangkap”

Nunga tung loja Tuhanta i. Nunga tung marsipal Ibana. Nunga tung lam suda gogoNa. Nunga lobi sian tolu jom Ibana gantung di hau parsilang i. Tu ginjang Ibana ndang marhasangkotan, tu toru ndang marpahean. Ingkon lam dirutrut panghilalaanNa, ai lam runsur pamatangNa. Lam maribak ma tanganNa dohot patNa, pangalabangan i. Ruar ma muse mudar sian I alai ndang apala doras be, ai nunga lam suda mudar sian pamatangNa. Tung sude do pangontak ni ganup hahansiton I dihilala Ibana. Adong do nian na manurdukhon tu Ibana anggur na marsaor pogu, na dipangke halak uju I singkat ni obat bius asa ummiran nian dihilala. Ndang olo Jesus manjalo, ai ingkon hilalaonNa sude uhum ni Debata tu dosanta, di bagasan roha dohot pingkiran dohot panghilalaan na torang. Dihilala Tuhan Jesus naeng marujung ma ngoluNa, naeng pelehononNa ma diriNa tu Ama i. Di bagasan roha na torang IBANA. Ndang boi pangontak ni sitaonon I mangago roha dohot pingkiranNa di parsaoranNa dohot Ama i.

Jongjong ma hita!

Dung I dijouhon Tuhan Jesus ma:

(7) “AMANG! TU BAGASAN TANGANMU MA HUPASAHAT TONDINGKU!”

Dung didok songon i: tos ma hosanna. (Mangkuling ma giringgiring pitu hali)

Marende 84 : 1 – 2 “Aut na ginorga tu rohangku” BL. 195

Jadi, ida ma, laos di na satongkin I maribak ma hirehire na di Bagas Joro I, sian ginjang ro di toru. Di bagasan hamamate ni Jesus I jumpang ma na nidok ni Apostel Petrus: “Ai bangso na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuron halongangan i.” Laos songon I do di Pangungkapon 1:6 didok: Dijadihon do hita gabe harajaon hamalimon ni Debata.

Dung I humunta ma tano I, marigat ma dohot angka batu mamak. Mungkap ma dohot angka tanoman, dung I hehe ma daging ni torop na badia angka na modom disi, gabe ruar ma nasida sian angka tanoman i. Jadi dung hehe Jesus, ro do nasida tu huta na badia I pataridahon nasida tu torop halak. Dipataridahon do disi, ia di hamamate ni Jesus I, nunga talu hamatean, alai dipapatar I tu portibi on dung hehe Jesus sian na mate.

Nunga mate Jesus. Nunga hehe Ibana, jala nunga manaek tu banua ginjang. Mansai nalnal disi, holong ni Tuhanta, palua hita sian dosa dohot hamatean.

Ndang gantung be Ibana, nuaeng di hau pinarsilang i. Ndang jongjong be nuaeng silang di Golgata, alai anggo soaran ni Jesus di silang I, ingkon tongtong marsaringar di tongatonganta, marsaringar di ngolunta.

Auhon jala alusi saonari nang tu tingki na ro

Marende BE 412 : 1 + 3 “Ndi di dolok adui” BL. 387

Tangiang Pangujungi

Pasupasu, Amen-amen-amen

Tuhan Yesus Memberkati. Syalom!

Leave a Reply

Your email address will not be published. Required fields are marked *

Scroll to top